Kıyivde gece yapılğan Rusiye ücümi neticesinde, soñki malümatqa köre, 19 insan zarar kördi, dep bildirdi şeer başı Vitaliy Kliçko.
Onıñ qayd etkenine köre, beş insan ayaqta tedaviy ala, 14 kişi hastahanege alındı.
Şeer yolbaşçısınıñ aytqanına köre, Kıyivniñ bir qaç rayonında urulıp tüşürilgen uçaqlarnıñ parçaları qayd etildi, neticede yanğınlar çıqtı, mesken evler zararlandı.
"Dnipro rayonında dron parçaları mesken evlerniñ azbarına ve oquv yurtunıñ territoriyasına tüşti. Yanğın çıqmadı. Soloma rayonında parçalar sakinleri olmağan binağa tüşti. Em de garaj kooperativiniñ territoriyasında. O yerde yanğın bar. Aynı zamanda bu rayonda anbar binaları yanıp turdı. Ve memuriyet binasında yanğın oldı. Svâtoşın rayonında duşman dronlarınıñ parçaları anbarlarnıñ territoriyasına tüşti, neticede yanğın çıqtı. Bundan ğayrı, yıqılğan parçalar 16 qatlı mesken evniñ azbarına tüşti, maşnalar yandı. Şahsiy sektorda yıqılğan parçalar neticesinde yanğın çıqtı", — dep yazdı Kliçko telegramada.
Kliçkonıñ aytqanına köre, Ğoloseyevo rayonında da yıqılğan parçalar qayd etildi, bunıñ neticesinde tibbiy müessise zarar kördi.
"Ukrzaliznıtsâ" haber etkeni kibi, atış neticesinde şeerniñ demiryol infrastrukturası zarar kördi.
Kıyiv şeer arbiy memuriyetiniñ yolbaşçısı Timur Tkaçenko bildirdi ki, şeerde yanma mahsulatınıñ yüksek kontsentratsiyası bar.
Oraq ayınıñ 4-ne keçken gecesi Rusiye arbiyleri Ukrayina paytahtına pilotsız uçaq ve ballistik raketalarnen ücüm etti, dep bildire Ukrayina Silâlı quvetleriniñ Ava quvetleri.
Rusiye arbiyleri Ukrayina regionlarına çeşit silâ qullanıp muntazam sürette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturasına, vatandaş ealisini öldürgenine, hastahaneler, mektepler, bala bağçaları, energetika ve suv teminlevi obyektlerini yoq etkenine red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd eteler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.