Rusiye akimiyeti tarafından mahküm etilgen ve apiske alınğan qırımlı vatandaş jurnalistleri Server Mustafayev, Osman Arifmemetov ve Vilen Temeryanovnıñ sağlığı ep fenalaşa. Bu aqta ZMINA aq qorçalayıcı neşirine olarnıñ soy-sopları ve dostları bildirdi.
Haberge köre, esirlikte bulunğan qırımlı mabüslerniñ hronik hastalıqları daa beterleşe, bu hastalıqlar, soy-soplarınıñ aytqanlarına köre, tutuv şaraitleriniñ uyğun olmağanından ve Rusiye ceza müessiselerinde kerekli tibbiy yardımnıñ olmaması sebebinden çıqtı.
Berilgen malümatqa köre, hususan, Server Mustafayevniñ adale-taqlet sistemasınıñ hastalıqları, qalqan bezi problemleri, yürek ağrılarından ve körüv qabiliyetiniñ zayıflaşuvından çekişkeni belli. Oña umumiy tedaviylev kerek.
Mustafayev – vatandaş jurnalisti ve «Qırım birdemligi» cemaat birleşmesiniñ koordinatorı. O, 2018 senesi Rusiye uquq qoruyıcıları tarafından tintüvlerden soñ tutuldı. 2020 senesi Rusiye Federatsiyasında yasaqlanğan, amma bir çoq memlekette ruhset etilgen «Hizb-ut-Tahrir» teşkilâtınıñ faaliyetine qoşulğanında qabaatlanıp, 14 yılğa üküm etildi.
Osman Arifmemetovnıñ büyrek hastalığı, buğum artrozı, prostatit, ayaq hastalıqları bar. Oña acele tibbiy teşkerüv kerek.
Arifmemetov aynı vaqıtta vatandaş jurnalisti ola, o, apiske alınmazdan evel qırımtatar faalleriniñ tintüvlerini ve mahkemelerini aydınlatmağa yardım etti. Onı da «Hizb ut-Tahrirnen» bağlı olğanında qabaatladılar ve 2022 senesi 14 yılğa mahküm ettiler.
Bu haberge köre, Vilen Temeryanovnıñ tişleri qalmadı ve acele tiş ekimine baqtırılmalı. 2023 senesi «Qırım birdemligi» bildirgenine köre, o, Rusiye SİZO şaraitlerinde közleri yaramay körip başladı. Vatandaş jurnalisti olğan Temeryanov qırımtatar faalleriniñ tutuluvını ve siyasiy mahkemelerini aydınlattı. Rusiye uquq qoruyıcıları onı 2022 senesi avgust ayında tutıp, «Hizb ut-Tahrir» faaliyetinde qabaatladı, lâkin ükmü şimdilik çıqarılmadı.
Rusiye akimiyeti ve Cezalarnı yerine ketirüv federal hızmetiniñ vekilleri bu beyantlarnı izaatlamadılar.
2014 senesi Qırım işğalinden soñ Rusiye yarımadanıñ ukrayin tarafdarı ealisine, hususan qırımtatar halqınıñ vekillerine qarşı siyasiy sebepli repressiyalarnı muntazam sürette qullana.
Qırımtatar resurs merkeziniñ bildirgenine köre, Qırımnıñ iğali devamında aq qoruyıcılar 399 mabüsni qayd etti, olardan 241-i qırımtatardır.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.