ABD prezidenti Donald Trump ve Rusiye prezidenti Vladimir Putin telefonda laf ettiler. Bu aqta Rusiye kütleviy haber vastalarına Rusiyeniñ ABD elçisi Yuriy Uşakov bildirdi.
Onıñ aytqanına köre, subet aman-aman bir saat devam etti.
«Trump kene Ukrayinadaki cenkniñ tez bitmesinen bağlı meseleni köterdi. Putin zıddiyetniñ muzakere qararını qıdırmağa devam etemiz, dep qayd etti. Rusiye tarafınıñ muzakere esnasına devam etmek azır olğanını da qayd etti», – dep bildirdi o.
O, subet vaqtında Putin «Rusiye Ukrayinadaki zıddiyetniñ sebebi olğan mahsus arbiy operatsiyanıñ (Rusiye Ukrayinağa qarşı cenkini böyle adlandıra – QA) maqsadlarına irişmege tırışacaq. Olaradn vazgeçmeycek», dep bildirdi.
Haber etilgenine köre, Putin «Trumpqa muvafaqiyetler tiledi» ve iyülniñ 4-nde qayd etilgen ABD Mustaqillik Kününen hayırladı.
Beyaz saray subetni şimdilik izaatlamadı.
Soñki sefer Putin ve Trump iyünniñ 14-nde telefonda laf ettiler. Bu beşinci subet oldı. Bundan evel iyunniñ 4-nde laf etken ediler.
ABD prezidenti Donald Trump iyülniñ 3-nde Rusiye prezidenti Vladimir Putinnen laf etecek, dep bildirdi. O, bu aqta Truth Social içtimaiy ağında yazdı.
Bugün Putinniñ Trumpnen telefon subeti olğanını «İnterfaks» agentligi Rusiye lideriniñ malümatına esaslanıp bildirgen edi.
Financial Times neşiri aytmağan menbalarına esaslanıp, iyülniñ 4-nde Trump ABDden bazı esas silâ çeşitleriniñ berilüvini toqtatuv meselesini muzakere etmek içün Ukrayina prezidenti Volodımır Zelenskıynen telefonda laf ete bile, dep yazğan edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
