«Sarı şerit» areketi iyülniñ 2-nde Aqmescit, Aqyar, Kezlev ve Saqta yerleştirilgen Ukrayina tirenüvi timsalleriniñ yañı fotoresimlerini derc etti. Bu paylaşuv areketniñ Telegram kanalında peyda oldı.
«Aqmescit, Aqyar, Kezlev ve Saqta tirenüv devam ete. «Sarı şerit» areketiniñ faalleri sayesinde Ukrayina timsalleri Qırımnıñ şeerlerinde kene peyda ola – Aqmescit, Aqyar, Yalta ve diger yerlerde. Tirenüv kün-künden quvetleşe. Çünki Qırım – Ukrayinadır!», – dep yazdı fotoresim altında faaller.
«Sarı şerit» teşkilâtı – Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areketniñ teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faaldir, hususan Aqmescit, Yalta, Kezlev ve Kefede, soñki vaqıtları ise olarğa Simeiz, Balıqlava kibi kiçik şeerlerniñ sakinleri qoşula.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
