Rusiye 16 yılğa üküm etken qırımtatar faali ve vatandaş jurnalisti Seyran Saliyev kene Rusiyeniñ Tula vilâyetindeki №4 tüzetüv koloniyasınıñ ceza izolâtorına alındı. Bu aqta «Qırım birdemligi» ömür arqadaşı Mümine Saliyevanıñ malümatına esaslanıp haber ete.
Onıñ aytqanına köre, qırımlı iyünniñ 10-ndan berli ceza izolâtorında buluna. Bundan evel o, anda 2024 senesi noyabrniñ 20-nden 2025 senesi martnıñ 1-ne qadar tutulğan edi.
Saliyeva qayd etkenine köre, iyünniñ 27-nde aqayınen uzun körüşüvi olmaq kerek edi. O, bilet sımarladı ve daire kiraladı. Lâkin körüşüvden bir qaç kün ögüne koloniyadan nevbetçi telefon etip, qırımtatarı ceza izolâtorında buluna ve körüşüv olmaycaq, dep bildirdi.
İzolâtorğa aluv sebepleri telefonda aytılmadı. Müessise vekili ceza izolâtorında tutuv sebepleri ve müddetleri tek yazma şekilde cevaplanacaq, dep haber etti.
Saliyev izolâtorğa «formal sebeplerden» bir qaç kere alınğan edi – meselâ, urbanı dügmelemegeni içün, töşekni yahşı toplamağanı içün ve ilâhre.
Seyran Saliyev Rusiye quvetçileri tarafından 2017 senesi orta küz ayında tutuldı. Onı Rusiyede yasaqlanğan «Hizb ut-Tahrir» teşkilâtınıñ faaliyetinde qabaatladılar. 2020 senesi Rusiye mahkemesi Saliyevni 16 yılğa üküm etti.
Apiske alınmazdan evel Saliyev ekskursiya reberi olıp çalıştı. Tasil boyunca o, türk ve qırımtatar tilleriniñ filologıdır. Saliyev «Qırım birdemliginiñ» vatandaş jurnalisti edi ve qırımtatarlarnıñ Rusiye akimiyeti tarafından taqip etilüvini aydınlata edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
