Link açıqlığı

Saatnıñ esas haberi

Trump: İsrail Gazzede 60 künlik ateşkeske razı oldı


Gazze, 2025 senesi iyünniñ 30-ı
Gazze, 2025 senesi iyünniñ 30-ı

İsrail ABD ile muzakerelerde Gazzede 60 künlik ateşkesni ilân etmek içün kerekli şartlarğa razı oldı, dep bildirdi ABD prezidenti Donald Trump.

«İsrail 60 künlik ateşkes içün kerekli şartlarğa razı oldı, bu müddet devamında cenkni bitirmek içün er bir tarafnen çalışacaqmız. Barışıq ketirmege tırışqan Qatar ve Mısır bu soñki teklifni taqdim etecekler», – dep qayd etti Trump.

ABD prezidenti ABD ve Avropa Birligi tarafından terrorist olaraq tanılğan «Hamas» añlaşmanı qabul etecegine ümüt etkenini bildirdi, yoqsa vaziyet tek daa beter olacaq.

Trumpnıñ yazğanlarına prezidentnen açıq davağa kirgen ABD ükümeti semerelik departamentiniñ sabıq yolbaşçısı, milliarder İlon Mask cevap berdi. «Trump bütün dünyada bir qaç ciddiy zıddiyetni muvafaqiyetnen çezdi», – dep yazdı Mask X içtimaiy ağında.

İsrail resmiy şahısları Trumpnıñ beyanatını şimdilik izaatlamadı.

Aracı olğan arap memleketlerinden biriniñ vekili The Times of Israel neşirine gumanitar yardımnı tarqatuvnen bağlı meseleler alâ daa davalı qala, dep bildirdi. «Hamas» eski mehanizmlerge qaytmağa ya da Gazze gumanitar fondu idare etken yañı bir sistema qurmağa teklif ete. İsrail bildirgenine köre, bu fond yardım filistinli gruppalar tarafından qaçırılmasın dep kerek eken.

Reine ve barışıq muzakerelerini Trumpnıñ Yaqın Şarq mahsus vekili Steven Witkoff idare ete. Muzakere ketişatından haberdar olğan menbalarğa köre, soñki teklifinde «Hamas» 60 kün içinde sağ olğan on İsrail reinesini azat eter ve 18 elâk olğannıñ cesedini berer, dep aytıla. Qalğan reineler daimiy ateşkes añlaşması olsa, azat etilecektir.

Gazzede 2023 senesi oktâbrniñ 7-nden berli 50 reine qala. Tahminen 20 kişi sağ.

Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.

XS
SM
MD
LG